D' KING O KASEDRI by Rachel Nebauer-Borg

Rachel Nebauer-Borg

Hi driim ap’ skiim orn his taala liif throen

En korl orn’ salan wen hi noe dem nor hoem

Hi lew nort faa fram ya en hi s’ kam aas’ mii,

F’ sam’dem fruut orf aa Kaawaa Trii.

Nau Jorj, ai bin luk f’ daa thing ap hai en daun loe

Hepi, eni yorlye noe wesaid aa blesed thing groe!

En ai ya tal em behk’frut hi gu ap gif’ dem

Es uni dem wan orf d’ baeses o lem.

En ef yu thort yu gwen gedap en biit hem yuu worn,

Yu fain hi deya fas lait bifor yu iiwen s’ born.

Hi slep krors em waeli en sluu raun em ben

Es truu es his kraaf en’ kaning kaa en.

Yu bin miit hem ai nowet ko hi orlwes slepen’baut

Tipen or yus shed en muuwen yus thing raun w’laut

En ef aewa yu aut orn’ roed  in’ nait,

Noe es hem d’ wan giw yu daa plari big frait.

Ef yu naewa bin kech faret yu teket fram mii

Hi gat gamshan en chiik – hi es riiyl potagii.

Kaning es kaning es his fas en laas niem

Es truu e’e kaa shiem en kaa dan’ m’giem.

Yu kaa fainet ala faitet en noe yuus yu trai

Hi uni gwen kam baek gat wan baeta replai.

Nau daa King hi es salan mus naewa el sliip

Bat maak mais werds ya, hi es salan el kiip!

Faewa hi pinchen em biebi en drop’ gehls drors

Boelen yus baes baket en loken em dors

Tai yus shuulies agaeda, pat’ solt iin yus tii

Liiw em painpich iin yus saedl f’ yu pilipilii

Sen aa letl skrepa ap f’ melk fram aa wailes nyuu bul

Waili Aant iin wan cheya lorngf’ graenmaas baes wul.

Nau wieh hi el torkbig en miekbig en orlwes hau glehd f’ si yuu

Talen pliis ef yu el, laan’ mii “Wathing ai el kam krors en duu?”

Bat  lukaut en mainaut wenaewa yu tip ap ala flai ap’ wieh ap in’ eya

Bembeya es hem d’ wan orn top o yus kabad ala anda yus steya.

Hi uuli shefen his korth en hi shefen adres

Liiwen’ haewak en wan big pail’ mes.

Hi es haadan f’ kech en iiwen haad’ f’ bliem

Ko hi f’aewa hi chienjen his fies en hi chienjen his niem

Wan dieh hi es Kwentl ala Aedams, Mekoi

Hi es oel mien, en yang mien en swiit biebi boi

Hi es torl mien en short mien en morga en raun

Hi es fishaman, behnka en mien daun’taun

Hi es Stiils Point, en Roki Point en Bambuuras salan,

En es hem d’ wan pinchen yus nyuu siisan malan.

Hi es slaian en sleprian en haadan f’ kech,

En em oel salan bin tal hi es ‘radi griet rech’.

Sam salan korlet ‘poet’ en sam tal es ‘tampaalii’

En yu fain hi es relieted t’ daa fala ‘Ent Mii’.

Ef yu kechet tal’ hem f’ shefap en shedap en shiepap kwik stiks

Kos aa dewl gwen kam f’ hem lorng’ his pichfork en triks.

Bat shuwa es ai ya, ai noe gwen’ bii,

Daa King hi s’ plieh d’ laas jok orn wi thrii

Kos jes yestedi mais kasn kam or f’ himii,

Laan hi s’ fain wan wi Kaawaa Trii.

Bat nort orn yus Nele, ai nor mus el agrii –

Kos dem es thing uni groe orn’ kadesrii.

Nau anieh!